तेंडूलकर ..

जगाच्या इतिहासात सगळ्यात जास्त हृदयाचे ठोके ज्या माणसामुळे चुकले असा माणूस म्हणजे - तेंडूलकर
(१६ मार्च : आज "हृदयाच्या ठोक्यांचा" फार मोठा घोटाळा झाला - किती कोटी ठोके चुकले ते ब्रम्हदेव calculate करत बसलेत)

 

 

आज भारतातली हृदये आज सगळ्यात जास्त धडधडली,
स्वप्नांचा पाठलाग करताना म्हणे हृदये धडधड करतातच.
"शतकांचे महाशतक" हे महास्वप्न पूर्ण करण्यासाठी १ माणूस १०० कोटी हृदये बरोबर घेऊन लढत होता.
तो जिंकला , मी जिंकलो आणि १०० कोटी लोक जिंकले ..

 

 

काही तेंडूलकरचे critics म्हणे आज तोंडाला काळा रंग लावून फिरत होते आणि सांगत होते "होळीचा रंग अजून उतरला नाही..!!!!

ह्रदयात एक झंकार दे

सुचतच नाही, काही शब्द उधार दे
गातच नाही मी, गाण्याची एक बहार दे


नको टांगुस जिवाला, होकारही राहु दे
लटक्या रागात, एक रुसलेला नकार दे

टेकवुन माझ्या छातीवर डोके, तू विसावा घे
अन तुझ्या सुगंधी श्वासाने ह्रदयात एक झंकार दे

 

---BinaryBandya™  

 

सचिन ..

 

ब्रह्मा : कलियुगातली सगळी शतके संपली, चला जग बुडवायच्या तयारीला लागा .
विष्णू : थांब ये ब्रम्ह्या !!! तेंडुलकरचे महाशतक झाल्याशिवाय जगबुडी करायची नाय ...

 

 

---BinaryBandya™   

नवे वर्ष...

 दारूच्या धुंदीत बुडवुन चंद्र
सिगारेटच्या धुरात फुंकून सूर्य
संगीताच्या तालावर थिरकणारे पाय
उजाडले तरी थकलेच नाय
त्यांना नवे काय अन जुने काय ?
वर्ष सरले? कळलेच नाय  





कॅलेंडर भिंतीवर
तारीख डोक्यावर
घड्याळ मानगुटीवर  
जुनी धुंदी उतरलीच नाय
नवे संकल्प? म्हणजे काय ?
तसेच दिवस
अन तशाच रात्री
नवे काय अन जुने काय ?
वर्ष सरले? कळलेच नाय

---BinaryBandya™    

Personlized देव

व्यक्तिपरत्वे वेगळा देव,
जातीनुसार आगळा देव,
वेशीवर एक, अन गावात एक
गावकुसाबाहेरचा भोंगळा देव

आमचा तुमचा इतिहास एकच
तरीही माझा रंग आगळा
अन तुमचा रंग वेगळा 
आमचा आगळा पुतळा 
अन तुमचा वेगळा पुतळा

मीही मांडला इतिहासाचा बाजार
तुमच्यासारखाच, मला हवातसा
काही बेरजा अन काही वजाबाक्या
Personlized देव तयार हवातसा

---BinaryBandya™   

आयुष्याची गणिते

सताड उघड्या डोळ्यांनी मी अंथरुणावर पडतो
अन दिवसाचा शिनवटा अंथरुणातच विरतो
मात्र उद्याची गणिते रात्री छतावर जागा शोधू लागतात
अन छतावर चिटकवलेल्या चांदण्या अंधुक होत जातात

चांदण्या साथीला असूनही मग मी भरकटतो

गणितांच्या जाळ्यात अलगद जाऊन अडकतो
एखादे सुटलेले गणित दुसऱ्याच गणितात अडकते
अन एक एक चांदणी छतावरून अलगद गळून पडते

शेवटी छतावर एखादीच चांदणी उरते
तेवढीच डोळ्यात घेऊन माझी रात्र सरते
बरं झालं छतावर मी सूर्य नाही चिटकवला
ह्या गणितांच्या ग्रहणात तोही असता अडकला

---BinaryBandya™   

जगणे माझे

कधी रुसवा होतो माझाच माझ्या देवाशी
मग रंगते भांडण माझेच माझ्याशी
स्वतःला मग स्वतःच समजवायचे
हृदयावर ओरखड्यांचे गोंदण सजवायचे

रंगही माझेच अन ढंगही माझेच 
रुसणेही माझेच अन फसणेही माझेच
त्याला तर नसते घेणे कशाशीच ...
जगणेही माझेच अन मरणेही माझेच

---BinaryBandya™